हैदराबाद : हैदराबाद येथील राजीव गांधी आंतरराष्ट्रीय स्टेडियमवर खेळवल्या गेलेल्या चौथ्या T20 सामन्यात वेस्ट इंडिजने यजमान भारतीय संघाचा २४ धावांनी पराभव करत मालिकेत २-२ अशी खळबळजनक बरोबरी साधली आहे. वेस्ट इंडिजचा कर्णधार शाय होपचे नाबाद शतक आणि वेगवान गोलंदाज कीमो पॉलच्या पंजाच्या (५ बळी) जोरावर वेस्ट इंडिजने या विजयाची नोंद केली.
प्रथम फलंदाजीचे आमंत्रण मिळाल्यानंतर वेस्ट इंडिजने निर्धारित २० षटकांत ३ बाद २४७ धावांचा डोंगराएवढा डोंगर उभारला होता. प्रत्युत्तरादाखल विशाल धावसंख्येचा पाठलाग करताना भारतीय संघ १९.३ षटकांत २२३ धावांवर सर्वबाद झाला.
शाय होपचे वादळी शतक; विंडीजची २४७ धावांपर्यंत मजल
नाणेफेक गमावून प्रथम फलंदाजीस आलेल्या वेस्ट इंडिजची सुरुवात आक्रमक झाली. कर्णधार शाय होपने अवघ्या ५० चेंडूंत ४ चौकार आणि ९ षटकारांच्या मदतीने नाबाद १०२ धावांची तडाखेबंद शतकीय खेळी केली. वेस्ट इंडिजकडून आंतरराष्ट्रीय T20 मध्ये सर्वाधिक तिसरे शतक झळकावणारा तो फलंदाज ठरला. त्याने डावातील अखेरच्या दोन चेंडूंवर सलग दोन षटकार ठोकून आपले शतक पूर्ण केले. त्याला शिमरॉन हेटमायर (१२ चेंडूंत ३३ धावा – ४ चौकार, २ षटकार) आणि शेरफेन रदरफोर्ड (२६ चेंडूंत नाबाद ४० धावा – ४ चौकार, ३ षटकार) यांनी सुरेख साथ दिली. या वादळी फलंदाजीच्या जोरावर विंडीजने भारतासमोर २४८ धावांचे कठीण आव्हान ठेवले.
संजू सॅमसनचा तडाखा; कीमो पॉलने मोडले भारताचे कंबरडे!
२४८ धावांच्या विशाल लक्ष्याचा पाठलाग करताना भारताकडून संजू सॅमसनने आक्रमक सुरुवात केली. सॅमसनने अवघ्या २३ चेंडूंत ६ चौकार आणि ४ षटकारांच्या मदतीने ५६ धावांची धुवाधार खेळी करत भारताच्या आशा जिवंत ठेवल्या होत्या. मात्र, वेस्ट इंडिजचा वेगवान गोलंदाज कीमो पॉल या सामन्यात भारतासाठी काळ ठरला. पॉलने पाचव्या षटकात सामन्याला कलाटणी देताना सेट फलंदाज संजू सॅमसनसह ईशान किशनला (६) बाद करून भारताला एकाच षटकात दोन मोठे धक्का दिले. त्यानंतर नवव्या षटकात कर्णधार श्रेयस अय्यर (१६) बाद झाल्यावर १२ व्या षटकात गुडाकेश मोतीने अभिषेक शर्मा (२९) आणि नमन धीर (०) यांना बाद करून भारताची अवस्था बिकट केली.
तिलक-नितीशची झुंज अपुरी; पॉलचे १९ वे घातक षटक
मध्यक्रमात तिलक वर्माने २५ चेंडूंत ४३ धावा (२ चौकार, ३ षटकार) आणि नितीशकुमार रेड्डीने २० चेंडूंत ४१ धावा (१ चौकार, ४ षटकार) करत भारताला विजयाच्या शर्यतीत कायम ठेवण्याचा प्रयत्न केला. मात्र, कीमो पॉलने १९ व्या षटकात भेदक मारा करत नितीशकुमार, प्रिन्स यादव आणि अक्षर पटेल यांना बाद करून विंडीजचा विजय निश्चित केला. कीमो पॉलने ४ षटकांत ४५ धावा देऊन तब्बल ५ बळी घेतले.
अर्शदीप सिंग दुखापतीमुळे निवृत्त (Retired Hurt – ५ धावा) झाल्यानंतर भारताचा डाव २२३ धावांवर आटोपला.
