पुणे : महाराष्ट्र आणि गोवा राज्यातील महाविद्यालये व विद्यापीठांमध्ये सहायक प्राध्यापक पदासाठी आवश्यक असलेली राज्यस्तरीय पात्रता परीक्षा (SET) पुन्हा एकदा पुढे ढकलण्यात आली आहे. सावित्रीबाई फुले पुणे विद्यापीठाच्या सेट विभागामार्फत आयोजित करण्यात येणारी ४१ वी SET परीक्षा आता २५ ऑक्टोबर २०२६ रोजी घेण्यात येणार आहे. विशेष म्हणजे, या परीक्षेची तारीख आतापर्यंत तीन वेळा बदलण्यात आली असून आता चौथ्यांदा परीक्षा पुढे ढकलण्यात आली आहे.
या संदर्भात सावित्रीबाई फुले पुणे विद्यापीठाच्या कुलसचिव तथा SET परीक्षेच्या सदस्य सचिवांकडून परिपत्रक जारी करण्यात आले आहे. सुधारित वेळापत्रकानुसार परीक्षार्थींनी परीक्षेची तयारी करावी आणि २५ ऑक्टोबर २०२६ ही नवीन तारीख नोंदवून घ्यावी, असे आवाहन करण्यात आले आहे.
आधी २६ जुलैला होणार होती परीक्षा
SET परीक्षेचे सुरुवातीचे वेळापत्रक २६ जुलै २०२६ असे निश्चित करण्यात आले होते. मात्र, त्याच कालावधीत महाराष्ट्र लोकसेवा आयोगाच्या (MPSC) विविध परीक्षा तसेच आषाढी वारीच्या पार्श्वभूमीवर मोठ्या प्रमाणात होणारा प्रवास लक्षात घेण्यात आला. त्यामुळे परीक्षार्थी आणि प्रशासनाला होणाऱ्या संभाव्य अडचणींचा विचार करून SET परीक्षेची तारीख बदलण्यात आली.
यानंतर ही परीक्षा ६ सप्टेंबर २०२६ रोजी घेण्याचे जाहीर करण्यात आले होते. मात्र, ६ सप्टेंबर रोजीच केंद्रीय माध्यमिक शिक्षण मंडळाची (CBSE) केंद्रीय शिक्षक पात्रता परीक्षा (CTET) होणार असल्याचे निश्चित झाले. त्यामुळे अनेक परीक्षार्थींसमोर दोन महत्त्वाच्या परीक्षांच्या तारखा एकाच दिवशी येण्याची शक्यता निर्माण झाली. परिणामी SET परीक्षा पुन्हा पुढे ढकलण्यात आली.
२७ सप्टेंबरची तारीखही बदलली
यानंतर SET परीक्षेसाठी २७ सप्टेंबर २०२६ ही तारीख निश्चित करण्यात आली. मात्र, या कालावधीत केंद्रीय लोकसेवा आयोगाची (UPSC) तसेच इतर विविध स्पर्धा परीक्षांची वेळापत्रके जाहीर झाली. अनेक उमेदवार SET सोबत इतर स्पर्धा परीक्षांचीही तयारी करत असल्याने परीक्षा तारखांमध्ये होणाऱ्या संघर्षाचा मुद्दा पुन्हा समोर आला.
यामुळे विद्यार्थ्यांच्या हिताचा विचार करून SET परीक्षेची तारीख पुन्हा बदलण्याचा निर्णय घेण्यात आला आहे. आता २५ ऑक्टोबर २०२६ रोजी ४१ वी SET परीक्षा होणार आहे.
परीक्षार्थींना दिलासा मिळणार?
SET परीक्षा ही महाराष्ट्र आणि गोवा राज्यातील महाविद्यालये व विद्यापीठांमध्ये सहायक प्राध्यापक पदासाठी पात्रता निश्चित करण्याच्या दृष्टीने महत्त्वाची मानली जाते. त्यामुळे परीक्षेची तारीख वारंवार बदलल्याने विद्यार्थ्यांच्या अभ्यासाचे नियोजन आणि तयारीवर परिणाम होण्याची शक्यता आहे.
आता २५ ऑक्टोबरची तारीख निश्चित झाल्याने परीक्षार्थींना अभ्यासाचे नियोजन नव्याने करता येणार आहे. विद्यार्थ्यांनी विद्यापीठाकडून जारी करण्यात येणाऱ्या अधिकृत सूचना, परीक्षा केंद्राची माहिती आणि प्रवेशपत्रासंदर्भातील अपडेट्सकडे लक्ष ठेवावे.
