मुंबई: ‘मुरांबा’ या अत्यंत लोकप्रिय मालिकेतून प्रेक्षकांच्या मनावर राज्य करणारी अभिनेत्री शिवानी मुंढेकर आता एका संपूर्णपणे वेगळ्या आणि अनोख्या भूमिकेतून प्रेक्षकांच्या भेटीस येत आहे. ‘मुरांबा’ मालिकेतील तिने साकारलेली ‘रमा’ ही साधी, सोपी आणि गोड भूमिका प्रचंड गाजली होती. मात्र, आता ही मालिका संपल्यानंतर शिवानी झी मराठी वाहिनीवरील आगामी ‘इच्छाधारी नागीण’ या मालिकेत मुख्य भूमिका साकारताना दिसणार आहे. या नव्या मालिकेमुळे तिच्या चाहत्यांमध्ये प्रचंड उत्सुकता निर्माण झाली आहे.
“मीसुद्धा अशी अपेक्षा केली नव्हती…”
नुकत्याच दिलेल्या एका मुलाखतीत शिवानीने तिच्या या आगामी मालिकेबद्दल आणि आव्हानात्मक भूमिकेबद्दल मोकळेपणाने संवाद साधला. राजश्री मराठीशी बोलताना ती म्हणाली, “माझ्यासाठी हे सगळं एकदम नवीन आहे. कोणतीही गोष्ट पहिल्यांदा करताना मनात ज्या भावना असतात, तशाच भावना सध्या माझ्याही मनात आहेत. मनात थोडीशी धाकधूक आहे आणि सोबतच प्रचंड उत्साहसुद्धा आहे. सध्या माझ्यामध्ये उत्साह खूप जास्त आहे, कारण जे काही आता प्रेक्षकांना बघायला मिळणार आहे, त्याची मी स्वतः सुद्धा कधी अपेक्षा केली नव्हती. हे सगळं अनुभवताना खूप छान वाटतंय.
मॅनिफेस्टेशन ठरलं यशस्वी!
आपल्या अभिनय प्रवासातील या नव्या टप्प्याबद्दल बोलताना शिवानी पुढे म्हणाली, “मला नेहमीच वेगवेगळ्या प्रकारच्या भूमिका साकारण्याची इच्छा आहे. जे काही वेगळं आणि हटके असेल, ते माझ्या वाट्याला यावं आणि माझ्याकडून ते उत्तम प्रकारे करून घेतलं जावं, असं मी नेहमी मॅनिफेस्ट केलं होतं. माझं हे मॅनिफेस्टेशन आता कुठेतरी खरं ठरताना दिसत आहे. एका कलाकारासाठी वेगवेगळ्या धाटणीच्या भूमिका करायला मिळणं ही खूप मोठी आणि आनंदाची गोष्ट असते.”
चाहत्यांसाठी मोठं सरप्राइज आणि आव्हान
प्रेक्षकांनी शिवानीला आजवर अत्यंत सोप्या आणि कौटुंबिक भूमिकांमध्ये पाहिले आहे. त्यामुळे या नव्या रूपाबद्दल बोलताना ती म्हणाली, “प्रेक्षकांनी आधी मला खूप गोड भूमिकेत बघितलं आहे. पण आता मी जी भूमिका साकारत आहे, ती खूप वेगळी आणि प्रचंड आव्हानात्मक आहे. मला स्वतःलाही कधी वाटलं नव्हतं की मी स्क्रीनवर असं काहीतरी करेन. पण ही इच्छाधारी नागिणीची भूमिका साकारताना मला खूप मजा येत आहे आणि प्रेक्षकांनाही हे सरप्राइज नक्कीच आवडेल, असा मला विश्वास आहे.”
झी मराठीवरील नवा धमाकेदार प्रोमो
दरम्यान, सोशल मीडियावर या मालिकेची पहिली झलक आणि प्रोमो समोर आल्यापासून प्रेक्षकांमध्ये कमालीची उत्सुकता पाहायला मिळत आहे. नेहमी घरगुती आणि सोज्वळ रूपात दिसणारी शिवानी या मालिकेत एका चमत्कारी आणि रहस्यमय भूमिकेत कशी दिसेल, याची सोशल मीडियावर जोरदार चर्चा सुरू आहे. वाहिनीने देखील या मालिकेसाठी मोठी तयारी केली असून, ही मालिका प्रेक्षकांचे भरपूर मनोरंजन करेल असा अंदाज वर्तवला जात आहे.
चाहत्यांकडून मिळतोय भरभरून प्रतिसाद
शिवानीने घेतलेल्या या धाडसी निर्णयाचे तिच्या चाहत्यांकडून आणि सिनेसृष्टीतील सहकलाकारांकडून कौतुक होत आहे. एका साध्या भूमिकेतून थेट ‘इच्छाधारी नागीण’ बनण्याचा तिचा हा प्रवास तिच्या अभिनय कारकिर्दीला एक नवीन दिशा देणारा ठरेल, अशी चिन्हे आहेत. सोशल मीडियावर तिच्या या नव्या भूमिकेला प्रेक्षकांकडून आत्तापासूनच ऑल द बेस्ट आणि भरभरून शुभेच्छा मिळत आहेत.
हेही वाचा: शाहरुख-दीपिकाच्या गाण्याचा धमाका! ‘किंग’साठी मुंबईत भव्य सेटवर चित्रीकरणाची तयारी
