कळमेश्वर : दिवाळीच्या सणानिमित्त घरातील वापरात नसलेल्या; मात्र सुस्थितीत असलेल्या वस्तू गरजूंपर्यंत पोहोचवून सामाजिक बांधिलकी जपण्याचा स्तुत्य उपक्रम कळमेश्वर येथे राबविण्यात आला. विश्वव्यापी श्री गुरुदेव सेवा मंडळ, कळमेश्वर अंतर्गत राष्ट्रवंदना ढोल-ताशा व ध्वज पथकाच्या वतीने १ ते ४ नोव्हेंबर २०२६ या कालावधीत ‘एक हात मदतीचा – एक हात माणुसकीचा’ हा उपक्रम आयोजित करण्यात आला. ‘नको असेल ते द्या… हवे असेल ते घेऊन जा!’ या संकल्पनेतून हा उपक्रम राबविण्यात आला.
गरजूंसाठी उपयोगी वस्तूंचा उपक्रम
दिवाळीच्या पार्श्वभूमीवर अनेक घरांमध्ये स्वच्छता व साफसफाई केली जाते. यावेळी घरातील वापरात नसलेल्या, परंतु वापरण्यायोग्य असलेल्या वस्तू अनेकदा फेकून दिल्या जातात. या वस्तू कचऱ्यात जाण्याऐवजी गरजू व्यक्तींच्या उपयोगी पडाव्यात, या उद्देशाने या उपक्रमाची संकल्पना मांडण्यात आली. यामध्ये कपडे, चप्पल-बूट, पुस्तके, शालेय साहित्य तसेच इतर जीवनावश्यक वस्तू नागरिकांकडून जमा करण्यात आल्या.
हेही वाचा: नागपुरात रंगणार ‘स्वामिनी होम मिनिस्टर’ कार्यक्रम; पैठणी जिंकण्याची सुवर्णसंधी!
नागरिकांचा उत्स्फूर्त प्रतिसाद
या सामाजिक उपक्रमाला कळमेश्वरमधील नागरिकांनी उत्स्फूर्त प्रतिसाद दिला. अनेक नागरिकांनी आपल्या घरातील वापरण्यायोग्य वस्तू स्वेच्छेने जमा केल्या. दुसरीकडे, गरजू व्यक्तींनी आपल्या आवश्यकतेनुसार या वस्तू कोणतेही शुल्क न देता स्वीकारल्या. त्यामुळे एका व्यक्तीसाठी निरुपयोगी ठरणारी वस्तू दुसऱ्या व्यक्तीसाठी उपयुक्त ठरत असल्याचे चित्र या उपक्रमातून पाहायला मिळाले. वस्तूंचा पुनर्वापर करण्यासोबतच गरजूंच्या चेहऱ्यावर आनंद फुलविण्याचे काम या उपक्रमातून करण्यात आले.
पर्यावरण संवर्धनासह माणुसकीचा संदेश
हा उपक्रम शासनाच्या पर्यावरण विभागामार्फत प्रोत्साहित करण्यात येणाऱ्या ‘Reduce – Reuse – Recycle’ (RRR) अर्थात कमी वापर, पुनर्वापर आणि पुनर्चक्रण या पर्यावरणपूरक संकल्पनेशी सुसंगत आहे. वस्तूंचा अपव्यय टाळणे, कचऱ्याचे प्रमाण कमी करणे आणि सामाजिक गरजांची पूर्तता करणे हा या उपक्रमाचा मुख्य हेतू आहे. वंदनीय राष्ट्रसंत तुकडोजी महाराज यांच्या ग्रामगीतेतील विचारांपासून प्रेरणा घेत हा उपक्रम राबविण्यात आला.
सामाजिक उपक्रमातून सेवाभावाची प्रेरणा
समाजातील प्रत्येक घटकाने आपल्या परीने गरजू व्यक्तींना मदतीचा हात दिल्यास अनेकांच्या समस्या कमी होऊ शकतात, हा विचार या उपक्रमातून अधोरेखित झाला. केवळ आर्थिक मदतच नव्हे, तर आपल्या घरातील अतिरिक्त वस्तू गरजूंपर्यंत पोहोचविणे हेदेखील सामाजिक सेवेचे प्रभावी माध्यम ठरू शकते. अशा उपक्रमांमुळे समाजात परस्पर सहकार्य, संवेदनशीलता आणि पर्यावरणाविषयी जागरूकता निर्माण होण्यास मदत होते. भविष्यातही अशा सेवाभावी उपक्रमांना नागरिकांनी सहकार्य करावे, अशी अपेक्षा आयोजकांकडून व्यक्त करण्यात आली. राष्ट्रीय कीर्तनकार डॉ. सचिन काळे यांच्या मार्गदर्शनाखाली आयोजित या उपक्रमातून ‘आपल्यासाठी नको असलेली वस्तू कुणासाठी तरी गरजेची ठरू शकते’, हा माणुसकीचा संदेश समाजापर्यंत पोहोचविण्यात आला.
