न्यूयॉर्क : जगातील सर्वात मोठे क्रिप्टोकरन्सी एक्सचेंज असलेल्या ‘बायनान्स’वर (Binance) आतापर्यंतचा सर्वात मोठा सायबर हल्ला झाला आहे. हॅकर्सनी अवघ्या २० मिनिटांत बायनान्सच्या विविध ब्लॉकचेन वॉलेटमधून तब्बल ६.३ अब्ज डॉलर (सुमारे ५६,००० कोटी रुपये) किमतीची डिजिटल मालमत्ता लांबवली आहे. क्रिप्टो इतिहासातील ही आतापर्यंतची सर्वात मोठी चोरी मानली जात आहे. या हल्ल्यामागे उत्तर कोरियाच्या ‘ट्रेडर ट्रेटर’ या कुप्रसिद्ध हॅकिंग ग्रुपचा हात असल्याची शक्यता वर्तवली जात आहे.
Read Also: दुष्काळ आणि खासगी फायनान्सच्या त्रासाला कंटाळून लातूरमध्ये तरुणाची आत्महत्या
हॅकर्सनी असा केला सिस्टीममध्ये प्रवेश:
प्राथमिक तपासानुसार, हा हल्ला थेट ब्लॉकचेन सिस्टीमवर नसून, बायनान्सच्या एका ‘डेव्हऑप्स’ इंजिनिअरचा लॅपटॉप हॅक करून करण्यात आला. हॅकर्सनी या लॅपटॉपद्वारे कंपनीच्या अंतर्गत सर्व्हिस कंटेनरमध्ये घुसखोरी केली आणि अवघ्या काही मिनिटांत १० वेगवेगळ्या ब्लॉकचेनवरील निधी पळवला. मात्र, कोणत्याही ग्राहकाची ‘प्रायव्हेट की’ लीक झाली नसल्याचे कंपनीने स्पष्ट केले आहे.
तब्बल ३ अब्ज डॉलर गोठवण्यात कंपनीला यश:
घटनेचे गांभीर्य ओळखून बायनान्सने इतर ब्लॉकचेन भागीदार आणि ‘टेदर’ सारख्या कंपन्यांच्या मदतीने तातडीने शोधमोहीम राबवून चोरी झालेल्या निधीपैकी सुमारे ३ अब्ज डॉलर गोठवण्यात यश मिळवले आहे. उर्वरित निधीचा मागोवा घेण्याचे काम युद्धपातळीवर सुरू आहे. बायनान्सचे सह-सीईओ रिचर्ड टँग यांनी गुंतवणूकदारांना धीर दिला असून, सर्व ग्राहकांचे पैसे पूर्णपणे सुरक्षित असल्याचे जाहीर केले आहे. या नुकसानीची भरपाई कंपनी आपल्या ‘साफू’ (सिक्युरिटी असेट्स फंड फॉर युजर्स) या अंतर्गत आपत्कालीन निधीतून करणार आहे.
आतापर्यंत झालेले सायबर हल्ले आणि लुटलेली रक्कम (अंदाजे):
- बायनान्स (२०२६): ६.३६ अब्ज डॉलर
- बायबिट (२०२५): १.५ अब्ज डॉलर
- रॉनिन नेटवर्क (२०२२): ६२५ दशलक्ष डॉलर
- पॉली नेटवर्क (२०२१): ६१० दशलक्ष डॉलर
- कॉइनचेक (२०१८): ५३४ दशलक्ष डॉलर
- माऊंट गॉक्स (२०१४): ४७० दशलक्ष डॉलर
- एफटीएक्स (२०२२): ४७७ दशलक्ष डॉलर
ग्राहकांची माहिती लीक झाली का?
बायनान्सने स्पष्ट केले आहे की, हॅकर्सचा हेतू केवळ डिजिटल निधी चोरण्याचा होता. त्यामुळे ग्राहकांचे पासवर्ड, ईमेल आयडी आणि खात्यांच्या ‘प्रायव्हेट की’ पूर्णपणे सुरक्षित असून, युजर्सच्या वैयक्तिक डेटा सुरक्षेवर कोणताही परिणाम झालेला नाही. खबरदारीचा उपाय म्हणून सध्या एक्सचेंजवरील पैसे काढणे आणि भरणे तात्पुरते थांबवण्यात आले असून, पुढील ४८ तासांत ते पूर्ववत केले जाईल. दरम्यान या हल्ल्यानंतर कॉइन्ससह अनेक प्रमुख क्रिप्टो कॉइन्सच्या किमतीत ५ ते ८ टक्क्यांपर्यंत घसरण पाहायला मिळत आहे.
काय खबरदारी घ्यावी?
- पासवर्ड बदला: खबरदारीचा उपाय म्हणून तुमच्या बायनान्स खात्याचा लॉगिन पासवर्ड त्वरित बदला.
- २FA रिसेट करा: गुगल ऑथेंटिकेटर, युबिकी सारखी टू-फॅक्टर ऑथेंटिकेशन यंत्रणा पुन्हा तपासा आणि कडक करा.
- फिशिंग लिंक्सपासून सावध: हॅकर्स बनावट ईमेल किंवा लिंक्स पाठवू शकतात, त्यावर क्लिक करू नका.
- विड्रॉल सुरू होण्याची वाट पाहा: सध्या पैसे काढणे बंद आहे; ते पुढील २४ ते ४८ तासांत सुरू झाल्यावर व्यवहार करा.
- निधी ‘कोल्ड वॉलेट’मध्ये ठेवा: जास्त क्रिप्टो निधी लेजर किंवा ट्रेझर सारख्या हार्डवेअर वॉलेटमध्ये ट्रान्सफर करा.
Read Also: गर्भातच बाळाचा मृत्यू; नातेवाईकांचा संताप! नागपुरातील रुग्णालयात नेमकं काय घडलं?
