नाना पाटेकर यांनी हिंदी आणि मराठी चित्रपटसृष्टीत आपल्या बेधडक संवादफेकीमुळे आणि उत्कृष्ट कॉमिक टायमिंगमुळे अनेक ऐतिहासिक व संस्मरणीय भूमिका साकारल्या आहेत. आपल्या दमदार अभिनयशैलीने त्यांनी प्रत्येक व्यक्तिरेखा जिवंत करत प्रेक्षकांच्या मनावर वेगळीच छाप पाडली. त्यांच्या अभिनयातील सहजता आणि संवादफेकीचा खास अंदाज आजही प्रेक्षकांच्या स्मरणात घर करून आहे.
हेही वाचा: नाना पाटेकरांच्या निधनानंतर तनुश्री दत्ताची वादग्रस्त पोस्ट; म्हणाली, “मला भीती आहे की मीडिया…”
‘परिंदा’ मधील क्रूर ‘अन्ना सेठ’ अन् राष्ट्रीय पुरस्कार
१९८९ मध्ये प्रदर्शित झालेल्या विधू विनोद चोप्रा यांच्या ‘परिंदा’ या चित्रपटात नाना यांनी क्रूर आणि मानसिकदृष्ट्या अस्थिर अंडरवर्ल्ड डॉन ‘अन्ना सेठ’ची भूमिका साकारली होती या चित्रपटातील एका आगीच्या दृश्यादरम्यान ते प्रत्यक्षात गंभीररीत्या भाजले होते आणि त्यानंतर सुमारे एक वर्ष ते आजारी होते. या चित्रपटातील त्यांच्या दमदार अभिनयासाठी त्यांना सर्वोत्कृष्ट सहाय्यक अभिनेत्याचा राष्ट्रीय चित्रपट पुरस्कार मिळाला होता.
‘नटसम्राट’ मधील गणपत रामचंद्र बेलवलकर
वि. वा. शिरवाडकर यांच्या नाटकावर आधारित २०१६ मध्ये प्रदर्शित झालेल्या ‘नटसम्राट’ या चित्रपटात नाना पाटेकर यांनी ‘गणपत रामचंद्र बेलवलकर’ यांची भूमिका साकारली होती. मराठी चित्रपटातील या मास्टरपीसमध्ये एका वृद्ध आणि उपेक्षित रंगकर्मीची त्यांनी साकारलेली वेदनादायी अन् अत्यंत भावुक भूमिका त्यांच्या कारकिर्दीतील सर्वोत्तम अभिनयांपैकी एक मानली जाते. या भूमिकेसाठी त्यांना मराठी फिल्मफेअर पुरस्काराने सन्मानित करण्यात आले होते.
‘अब तक छप्पन’ मधील एन्काउंटर स्पेशलिस्ट
२००४ मध्ये प्रदर्शित झालेल्या ‘अब तक छप्पन’ या क्राईम-थ्रिलर चित्रपटात नाना पाटेकर यांनी मुंबई पोलिसांतील एन्काउंटर स्पेशलिस्ट इन्स्पेक्टर ‘साधू आगाशे’ यांची दमदार भूमिका साकारली होती. ही भूमिका प्रेक्षकांमध्ये विशेष लोकप्रिय झाली. शिमित अमीन दिग्दर्शित हा चित्रपट मुंबई पोलिसांचे सब-इन्स्पेक्टर दया नायक यांच्या वास्तविक जीवनावर आधारित होता.
‘क्रांतिवीर’ मधील ‘प्रताप टिळक’ अन् राष्ट्रीय पुरस्कार
१९९४ मध्ये प्रदर्शित झालेल्या ‘क्रांतिवीर’ या चित्रपटातील नाना पाटेकर यांनी साकारलेली ‘प्रताप टिळक’ची भूमिका प्रचंड गाजली होती. भ्रष्टाचाराविरोधात आवाज उठवणाऱ्या आणि समाजव्यवस्थेवर प्रहार करणाऱ्या त्यांच्या संवादफेकीने प्रेक्षकांना थक्क केले होते. चित्रपटाच्या शेवटी फाशीच्या तख्त्यावर जातानाचा त्यांचा प्रदीर्घ संवाद आजही भारतीय चित्रपटसृष्टीतील सर्वोत्तम सीन मानला जातो. या भूमिकेसाठी नाना पाटेकर यांना ‘सर्वोत्कृष्ट अभिनेत्याचा राष्ट्रीय चित्रपट पुरस्कार’ देऊन सन्मानित करण्यात आले होते.
‘वेलकम’ मधील कॉमेडी अन् ‘उदय शेट्टी’ची जादू
नाना पाटेकर हे केवळ गंभीर किंवा आक्रमक भूमिकांपुरते मर्यादित राहिले नाहीत, तर त्यांनी कॉमेडीमध्येही आपला दबदबा निर्माण केला. २००७ मध्ये प्रदर्शित झालेल्या ‘वेलकम’ या चित्रपटातील ‘उदय भाई’ (उदय शेट्टी) ही अंडरवर्ल्ड डॉनची व्यक्तिरेखा प्रेक्षकांनी डोक्यावर घेतली. “भगवान का दिया सब कुछ है…” आणि “कंट्रोल मजनू कंट्रोल…” हे त्यांचे संवाद आजही सोशल मीडियावर प्रचंड लोकप्रिय आणि मेम्सच्या रूपात ट्रेंडिंग आहेत.
हेही वाचा: नाना पाटेकरांच्या निधनानंतर तनुश्री दत्ताची वादग्रस्त पोस्ट; म्हणाली, “मला भीती आहे की मीडिया…”
