बॉलिवूडमधील अत्यंत यशस्वी हॉरर-कॉमेडी फ्रेंचायझी असलेल्या ‘स्त्री’ चित्रपटाच्या तिसऱ्या भागाची म्हणजेच ‘स्त्री ३’ची प्रेक्षक आणि चाहते प्रचंड आतुरतेने वाट पाहात आहेत. श्रद्धा कपूर आणि राजकुमार राव स्टारर या चित्रपटाबाबत आता एक अतिशय महत्त्वाची आणि मोठी बातमी समोर आली आहे. चित्रपट निर्माते दिनेश विजान आणि दिग्दर्शक अमर कौशिक यांनी या चित्रपटाच्या शूटिंगबाबत आणि रिलीज डेटबद्दल मोठा खुलासा केला आहे. ताज्या माहितीनुसार, ‘स्त्री ३’ चे शूटिंग तब्बल एका वर्षासाठी पुढे ढकलण्यात आले आहे, ज्यामुळे प्रेक्षकांना या चित्रपटासाठी आता आणखी काही काळ वाट पाहावी लागणार आहे.
‘स्त्री ३’ आधी येणार विकी कौशलचा ‘महावतार’
चित्रपटाचे शूटिंग पुढे ढकलण्यामागे एक महत्त्वाचे कारण समोर आले आहे. ‘स्त्री ३’ चे दिग्दर्शन करणारे अमर कौशिक हे सध्या दुसऱ्या एका मोठ्या प्रोजेक्टमध्ये व्यस्त आहेत. ‘स्त्री ३’ चे काम सुरू करण्याआधी विकी कौशलची मुख्य भूमिका असलेला ‘महावतार’ हा भव्य चित्रपट प्रेक्षकांच्या भेटीला येणार आहे. हे दोन्ही चित्रपट अमर कौशिकच दिग्दर्शित करत असल्यामुळे त्यांनी आधी ‘महावतार’ पूर्ण करण्याचा निर्णय घेतला आहे. ते आधी ‘महावतार’चे शूटिंग आणि पोस्ट-प्रॉडक्शनचे काम संपवतील आणि त्यानंतरच ‘स्त्री ३’च्या शूटिंगला अधिकृतपणे सुरुवात होणार
हैही वाचा: ‘वाराणसी’ची रिलीज डेट ठरली! प्रियंका – महेश बाबूचा सिनेमा ‘या’ दिवशी येणार!
दिनेश विजान यांनी एका विशेष कार्यक्रमादरम्यान बोलताना चित्रपटाच्या रिलीजबाबत स्पष्टीकरण दिले आहे. त्यांनी सांगितले की, “‘स्त्री ३’ हा चित्रपट २०२८ मध्ये प्रेक्षकांच्या भेटीस येईल”. या चित्रपटाची कथा कुठे व कशी सुरू होईल आणि तिची सांगता कुठे होईल, हे प्रेक्षकांसाठी पूर्णपणे एक गुप्त आणि मोठे सरप्राईज असणार आहे. निर्मात्यांनी चाहत्यांना आश्वासन दिले आहे की, २०२८ मध्ये स्वातंत्र्यदिनाच्या शुभमुहूर्तावर किंवा ख्रिसमसच्या सणादरम्यान प्रेक्षकांना चित्रपटगृहात एक अप्रतिम आणि धमाकेदार मनोरंजन रुपी गिफ्ट पाहायला मिळेल.
मॅडॉक सुपरनॅचरल युनिव्हर्स आणि प्रेक्षकांची उत्सुकता
‘स्त्री’ आणि ‘स्त्री २’ च्या अभूतपूर्व यशांनंतर दिनेश विजान यांच्या ‘मॅडॉक सुपरनॅचरल युनिव्हर्स’बद्दल प्रेक्षकांमध्ये प्रचंड उत्सुकता निर्माण झाली आहे. या युनिव्हर्समधील प्रत्येक चित्रपट बॉक्स ऑफिसवर नवनवे विक्रम रचत आहे. ‘स्त्री ३’ मध्ये केवळ हॉरर आणि कॉमेडीचा तडका नसेल, तर कथावस्तू आणि अनपेक्षित ट्विस्ट्स चाहत्यांना थक्क करून सोडतील, असा विश्वास निर्मात्यांनी व्यक्त केला आहे.
स्टारकास्ट आणि नव्या पात्रांची मेजवानी
या तिसऱ्या भागात श्रद्धा कपूर, राजकुमार राव, पंकज त्रिपाठी, अपारशक्ती खुराना आणि अभिषेक बॅनर्जी हे कलाकार पुन्हा एकदा प्रेक्षकांचे मनोरंजन करण्यासाठी सज्ज होणार आहेत. याशिवाय हॉरर-कॉमेडी युनिव्हर्समधील इतर काही पात्रांची सरप्राईज एंट्री देखील या चित्रपटात पाहायला मिळू शकते. त्यामुळे ‘स्त्री ३’ मधील नवे ट्विस्ट आणि पात्रांचे एकत्र येणे थिएटरमध्ये पुन्हा एकदा हास्याचा आणि भीतीचा कडकडाट निर्माण करेल, यात शंका नाही.
