Toxic Movie: कन्नड सुपरस्टार यशच्या बहुप्रतिक्षित ‘टॉक्सिक: अ फेयरी टेल फॉर ग्रोन-अप्स’ या चित्रपटाकडून प्रेक्षकांसह इंडस्ट्रीलाही मोठ्या अपेक्षा होत्या. यशचा स्टारडम, भव्य निर्मिती आणि वेगळ्या धाटणीची कथा यामुळे प्रदर्शनापूर्वीच या सिनेमाची जोरदार चर्चा रंगली होती. मात्र, चित्रपट रिलीज झाल्यानंतर समीक्षक आणि प्रेक्षकांकडून अपेक्षित प्रतिसाद मिळाला नाही. सोशल मीडियावरही चित्रपटाच्या कथानकासह सादरीकरणावर मोठ्या प्रमाणात टीका झाली. अशातच आता ‘टॉक्सिक’च्या अपयशानंतर यशची नेमकी प्रतिक्रिया काय होती, याचा खुलासा चित्रपटाच्या डबिंग सुपरवायझर जयदेव मोहन यांनी केला आहे. ‘प्रजावाणी’च्या युट्यूब चॅनेलला दिलेल्या मुलाखतीत जयदेव यांनी यशसोबत झालेल्या संवादाबद्दल सांगितलं. चित्रपट प्रदर्शित झाल्यानंतर रिव्ह्यू आणि प्रेक्षकांच्या प्रतिक्रिया पाहून आपण भावुक झालो होतो. यावेळी यशने मात्र त्यांना धीर देत फार चिंता न करण्याचा सल्ला दिला. यशच्या या प्रतिक्रियेत चित्रपटाच्या निकालाचा धक्का जाणवत असला, तरी परिस्थिती स्वीकारून पुढे जाण्याची त्याची भूमिका स्पष्टपणे दिसून आली.
प्रेक्षकांचा निर्णय स्वीकारावा लागतो यश म्हणाला, पुढे बरंच काम करायचंय
जयदेव मोहन यांच्या म्हणण्यानुसार, ‘टॉक्सिक’च्या प्रदर्शनानंतर त्यांचं यशसोबत फोनवर दोनदा बोलणं झालं. यावेळी यशने त्यांना, फार काळजी करू नका. हे प्रेक्षकांवर सोडून द्या. पुढे आपल्याला बरंच काम करायचं आहे, असं सांगितलं. यशने या प्रोजेक्टसाठी चार वर्षांहून अधिक काळ दिला होता. त्यामुळे एवढा मोठा काळ आणि मेहनत एका चित्रपटासाठी दिल्यानंतर अपेक्षित यश न मिळणं हे संपूर्ण टीमसाठी निश्चितच मोठा धक्का असल्याचं जयदेव यांनी मान्य केलं. मात्र, चित्रपट तयार करण्यासाठी टीमने प्रचंड मेहनत घेतली असली, तरी अंतिम निर्णय हा प्रेक्षकांचाच असतो, अशी स्पष्ट भूमिका त्यांनी मांडली. चित्रपट चांगला बनवला होता, पण लोकांना समजला नाही, असं म्हणत प्रेक्षकांच्या मताला नाकारणं योग्य ठरणार नाही, असंही त्यांनी स्पष्ट केलं. गीतू मोहनदास दिग्दर्शित ‘टॉक्सिक’मध्ये यशसोबत कियारा अडवाणी, नयनतारा, हुमा कुरेशी, तारा सुतारिया आणि रुक्मिणी वसंत यांच्या प्रमुख भूमिका आहेत. मोठं बजेट, भव्य सेट आणि यशची लोकप्रियता यामुळे या चित्रपटाकडे सर्वांचं लक्ष लागलं होतं. मात्र, अपेक्षित प्रतिसाद न मिळाल्यानंतर आता यशची ही संयमी प्रतिक्रिया चर्चेचा विषय ठरत आहे.
चार वर्षांच्या मेहनतीनंतरही अपेक्षाभंग आता पुढच्या प्रोजेक्टकडे लक्ष
‘टॉक्सिक’ () हा यशच्या कारकिर्दीतील महत्त्वाकांक्षी प्रोजेक्ट मानला जात होता. त्यामुळे या चित्रपटाकडून केवळ चाहत्यांनाच नव्हे, तर संपूर्ण सिनेसृष्टीला मोठ्या अपेक्षा होत्या. चित्रपटासाठी यशने दिलेला प्रदीर्घ वेळ आणि टीमने घेतलेली मेहनत पाहता, अपेक्षित यश न मिळणं ही संपूर्ण टीमसाठी भावनिक बाब ठरली. मात्र, या अपयशावर फार काळ चर्चा करत न बसता पुढील कामावर लक्ष केंद्रित करण्याचा यशचा दृष्टिकोन दिसून येतो. पुढे आपल्याला बरंच काम करायचं आहे, या त्याच्या विधानातूनही तो या निकालातून बाहेर पडून आगामी प्रोजेक्ट्ससाठी सज्ज असल्याचं स्पष्ट होतं. त्यामुळे ‘टॉक्सिक’च्या निकालानंतर यशने घेतलेली ही सकारात्मक आणि संयमी भूमिका त्याच्या चाहत्यांसाठीही चर्चेचा विषय ठरत आहे.
