गौराई विसर्जनासाठी गेलेल्या दोन मुलांचा तलावात बुडून मृत्यू; झिल्पा गावावर शोककळा

नागपूर : नागपूर जिल्ह्यातील काटोल तालुक्यातील झिल्पा गावात गौराई विसर्जनावेळी हृदयद्रावक घटना घडली. गौराई विसर्जनासाठी तलावावर गेलेल्या दोन 13 वर्षीय बालकांचा पाण्यात बुडून दुर्दैवी मृत्यू झाला. आयुष हरीष कुमरे आणि दर्शन धनराज लाड अशी मृत बालकांची नावे आहेत. दोघेही कुटुंबातील महिलांसोबत गौराई विसर्जनासाठी तलावावर गेले होते. सणाच्या उत्साहात घडलेल्या या घटनेने संपूर्ण गावाला मोठा धक्का बसला आहे.

विसर्जनावेळी दोन्ही बालकं पाण्यात बुडाली

गौराई विसर्जनाची प्रक्रिया सुरू असताना आयुष आणि दर्शन हे दोघेही तलावाच्या पाण्यात बुडाले. दोन्ही मुलं पाण्यात बुडाल्याचे लक्षात येताच त्यांच्या काकांनी क्षणाचाही विलंब न करता तलावात उतरून त्यांचा शोध घेतला. अथक प्रयत्नांनंतर दोन्ही बालकांना पाण्याबाहेर काढण्यात आले. त्यानंतर त्यांना तातडीने काटोल ग्रामीण रुग्णालयात उपचारासाठी दाखल करण्यात आले.

रुग्णालयात डॉक्टरांनी मृत घोषित केले

दोन्ही बालकांना रुग्णालयात दाखल केल्यानंतर वैद्यकीय अधिकाऱ्यांनी त्यांची तपासणी केली. मात्र, डॉक्टरांनी दोघांनाही मृत घोषित केले. सणाच्या दिवशीच दोन कुटुंबांवर दुःखाचा डोंगर कोसळल्याने परिसरात हळहळ व्यक्त होत आहे. या घटनेची माहिती मिळताच कुटुंबीय, नातेवाईक आणि गावातील नागरिकांनी रुग्णालयाकडे धाव घेतली.

एक आठवीत तर दुसरा सातवीत शिकत होता

आयुष कुमरे हा आठवीच्या वर्गात शिक्षण घेत होता, तर दर्शन लाड हा सातवीच्या वर्गात शिकत होता. दोन्ही मुलं अभ्यासासोबतच क्रीडा क्षेत्रातही सक्रिय होती. विशेष म्हणजे, आयुष आणि दर्शन हे जय भवानी क्रीडा मंडळाचे कबड्डीपटू होते. दोघेही नियमितपणे कबड्डीचा सराव करत होते.

कबड्डीपटूंच्या अकाली निधनाने गाव हळहळले

दोन्ही बालकांच्या अकाली निधनाने जय भवानी क्रीडा मंडळातील खेळाडू आणि सदस्यांवरही दुःखाचे सावट पसरले आहे. आपल्या गावातील दोन होतकरू खेळाडू गमावल्याने नागरिकांकडून हळहळ व्यक्त केली जात आहे. दोन्ही मुलांच्या कुटुंबीयांवर या घटनेमुळे मोठे संकट कोसळले आहे.

काटोल पोलिसांकडून घटनेची नोंद

या दुर्दैवी घटनेची नोंद काटोल पोलिसांकडून करण्यात आली आहे. पोलिसांकडून पुढील आवश्यक कार्यवाही सुरू आहे. गौराई विसर्जनाच्या दिवशी घडलेल्या या घटनेमुळे झिल्पा गावातील सणाचा आनंद क्षणात दुःखात बदलला असून, संपूर्ण गावावर शोककळा पसरली आहे.